مضواح بن شتوي (( اصلي وتقليد ))

شعر

2015-09-10 11:34:07
0
3047

من خــبرة الخــوة وتـــدريس الايام
ومن كثـــر مـا خويت بخلاء واجـاويد

ومن واقع الخبره على طول الاعوام
تجــــارب الدنــــيا صـــــدور ومــواريد

واهم ما حصلت في ســـرد الارقام
إن الـــــوفاء عيـــنته اصـلي وتقــليد

وعينت في العربان وافــين واقــزام
وحصلت فيهم مثل عنــتر وابوزيــــد

وعينت شيخ شيـــخته تــاج ووسام
ناموس ربعه في المهــمات صــنديد

اذا بدا الواجب وجــاء لازمــه قـــــام
شيخٍ على اسمــه شيخ تيدٍ على تيد

وعينت شيخ شيخته بــــس هـــندام
لا يقـــضي الـــلازم ولا فــاد لــه فيـــد

اهــم شي البشــت وشــــماغ بســام
والقصر والفكسـار ومقـــانص الصيد

والشيخة اللي صارت فلــوس واختام
ما تظـــهر الا فــي المنــصٌـات والـعيد

قولوا لاهـلها تجعل الشبــــح قـــدام
حمل الامانه تتعــب الـعــبد والسـيد

وعينت به شايب صمــيدع ومـــقدام
وعيــنت به شــايب مهـــرقل وعربــيد

وعيــــنت به شــــيخ يحــدّث ونـــمام
ثـــوبه قصير وجبــهته كنّـــها حــيد

وعينت به شــــيخان لـــــدين خـدام
نـــــور المـــساجد بـين فــقه وتوحـيد

وعينــت من فـــكره مغسّل وهــــدام
يهـــدم وفكـــره بيـن شبهــه وتنكيــد

وعينت منهو دون الاســلام ضـــرغـام
دون الــوطن ياقــف بــشـهب البِـواريد

وعينت عــدوان العقـــيدة والإســلام
بالعلــمنه والغــــدر والكـذب والـكــيد

يهـــمهم نصـــبح دويــــلات وأقســام
اقــلامــهم ضـــد العـــــقيده عبــــاريد

وعينت ناس للــــوطن درع وحـــزام
يهمهم نصبـح عصــب كـــف ونشــيد

ويصير مافيـــنا جهاهــيل واخصام
اخــوان في المـله ولا فيـــه تعــقيد

وعـينت لــي تاجر يـــدّور للأيتــــام
لا عــــيّن المحـــتـاج يعطــيه ويــــزيــد

في السر مايعـــلن بها بيـــن الآنام
يبـــذل ولا يـــــدري بـــها زيـد وعبيـد

وعيــنت لي تــاجر من العام للعام
يسعى ورا الســمعة وبعض المقاصـيد

اهم شي إن الـدعــــــاية والافـــــلام
يبـــثها الارسـال مــــــرات ويـــــعيد

ويحركــه صــوت الاهــازيج وأنـــغام
تــومـي بــه الشـيلات مـدري الأناشيد

يـــرده المايك على شــــاشة الكــــام
كـنه برئي راعي ســـــلوم وتقــاليد

وعينت في الشعار جـــزلين وآعلام
فطاحلة فـي الشعر والفعل والجــــيد

قصــــيدهم فــيه النزاهه والاحـــكام
ويمــــّجدونه قــــدوة الـــدين تمجيد

وعيـنت لي شـــاعر يـــدّور للإعــلام
اغلـب قصـــيده فــي المجالس مناقيد

يصيح باعلى الصوت يعني انا هآم
يبغــى يســوي لــه دعــاية وتجـديد

واكبر طموحه حاجـــتين بالاحـــلام
شهـــره ويملا الكــف من مـــدة الايييد

يالـــيت وان العـــود في للــــيلته نــام
ولا تعــــّرض صــيد حـــزم الجـلاميــد

مايدري ان حتى النسـاء طيرهن حام
يعلّــــمه ( قـــوقـل ) عـــن العــلم الاكـيد

واقرب مثل عيدة بحر شـعر وإلهام
والابـــداع فـازت بـه نجـاح المســاعــيد

وعينــنت لي ديـّـان صـــادق وهـــمهام
وافي ويصــــدق في جمـيع المواعيـد

وعينت لـِي ديـّــان طاغي وظلاّم
وفاه مثل الــــذم في باشـة الغـــيد

هذا بعض ماشفت في الشرق والشام
دونـتها بالـــسجل والرقــــم والــقـــــيد

واللي مهيضني على سـرد الارقــــام
ان الـــــوفـاء عيـــنته اصـــلي وتقــليد

مضواح بن شتوي

الموضوع السابق

جامع الحاكم بأمر الله

الموضوع التالي

مضواح بن شتوي (( اصلي وتقليد ))

موضوعات متعلقة